Archive for the ‘Активности’ Category
20 Дек
Што да се прави со играчките кои повеќе не ги употребувате?
REUSE – РЕУПОТРЕБИ – Подарете љубов!
- Подарете ги на дете во вашето пошироко семејство
- Донирајте ги играчките во хуманитарни акции или во училишта. Прашајте за можноста за донација и во здравствени установи.
ПРЕПОРАКА: Во тек е акцијата „Играта продолжува …“ – акција за собирање на употребени играчки (и боички, боенки, книги или украси за деца) и нивна донација на деца кои живеат во сиромаштија или се социјално исклучени, реализирана од страна на Здружение за зелено општество – Greener и Македонската платформа против сиромаштија (МППС). Донирајте …
RECYCLE – РЕЦИКЛИРАЈ – Бидете одговорни кон животната средина!
– E-отпад. Играчките кои што повеќе не се за употреба, а содржат електронски делови, не треба да се мешаат со комуналниот отпад, туку да се однесат до местата означени за одлагање на е-отпад.
– Батерии. Не ги исфрлајте играчките заедно со батерии во нив. Батериите секогаш фрлајте ги на соодветните места за таа намена. Внимавајте при изборот/купувањето на батериите – изберете батерии кои може повеќепати да се полнат и батерии кои содржат помали количини на жива и тешки метали.
– PVC. Овој материјал многу често се употребува во детските играчки, но лошо влијае врз животната средина. Неговото место не е во контејнерите за комунален отпад.
REDUCE – РЕДУЦИРАЈ – Скромноста е доблест!
- Поправете ги расипаните играчки, наместо веднаш да ги фрлите.
- Пред да купиш нова играчка, размисли дали навистина ти е неопходна.
15 Окт
Моќта на НИЕ!
Не е ништо ново дека заедно можеме повеќе. Исто како што многу пати до сега се покажало дека е потребно здружување за постигнување на некоја цел.
Но … Има некои работи кои ги правиме заедно и притоа постигнуваме голем успех, ама за жал, во негативна конотација.
На пример:
* НИЕ сме дел од мултимилионското пазарно општество … купуваме без мерка и трупаме непотребни количини на комерцијални предмети, а притоа не размислуваме дека за нивното производство се трошат огромни неповратни ресурси …
* НИЕ сме дел од модерните текови … следиме трендови и создаваме енормни количини на секаков отпад, а притоа воопшто не се грижиме каде истиот завршува и како влијае врз животната средина …
* НИЕ сме дел од профитабилни бизниси … креираме бизниси без обзири кон околината, уништуваме во име на профитот и не оставаме ништо за следните генерации …
* НИЕ сме дел од иднината … ги забораваме добрите навики од минатото и рушиме добри системи …
Всушност нашата моќ е во нашата одлука! Да донесеме правилна одлука!
НИЕ сме тие што ја поседуваат моќта за уништување на оваа планета, но НИЕ сме и́ тие кои со моќта на одлуката може да ја спасат планетата … тоа е нашата моќ … тоа е моќта на НИЕ!
16 Сеп
Пријавете се – кажете го своето!
Недела. Знам дека ова не е ден кој е баш којзнае колку погоден за големи размислувања, но ви нудам интересен предизвик.
Сакам да ве поттикнам да размислите за нешто кое вас би направило посреќни и вашата зедница одржлива, а воедно имате можност да бидете наградени за тоа.
Имено, на 30.07.2012 е започнат Националниот конкурс за активности, кои во принцип можат да бидат поддржани од фондовите на ЕУ, а на кој можете да аплицирате со сопствена идеја (како индивидуалец, активист или организација). Конкурсот е во организација на Еко-свест и CEE Bаnkwatch во рамките на програмата Европа за граѓаните на Европската Унија. Критериумите за конкурсот можете да ги најдете на следнава врска http://www.ekosvest.com.mk/docs/NGO%20dokumenti/nacionalen_konkurs_kriteriumi.pdf, а пријавата за учество на http://www.ekosvest.com.mk/mk/ngo-doc.php?id=16. За дополнителни информации не се двоумете да ги контактирате организаторите.
Како поттик, наградата за идеја која најмногу ќе придонесе кон одржливиот развој на Вашата заедница е во износ од максимум 3000 евра!
Ајде сега на размислување и пишување, но внимавајте, крајниот рок за поднесување на предлог идеите е 20 септември 2012 година.
Пријавете се – кажете го своето! Јас ви посакувам успех !
25 Јун
ФИЛАНТРОПИЈА ПРЕКУ ЗЕЛЕНИ ИДЕИ
КОНКУРС ЗА МАКЕДОНСКИ ОРГАНИЗАЦИИ И СОЦИЈАЛНИ ПРЕТПРИЕМАЧИ ЗА ЗЕЛЕНИ ИДЕИ/ПРОЕКТИ
$$$ можност да се добие награда од 10.000 долари $$$
ЦИРа распишува конкурс за доставување на идеи/проекти кои промовираат традиционална изработка на производи, мали бизниси вкоренети во заедницата и кои потикнуваат иновативни зелени идеи. Критериумите за учество во конкурсот се наведени подолу.
Крајниот рок за доставување на проектите е 5 јули 2012, до 17:00 часот. Формуларот за аплицирање со Вашиот зелен проект/идеја може да го најдете на http://www.cira.org.mk/index.php/en/capacity-building/news/205-2012-06-15-11-42-18
Пополнетиот формулар доставете го на email: cira@cira.org.mk
Тимот на ЦИРа врз основа на наведените критериуми ќе селектира 3 идеи/проекти на национално ниво. Избраните проекти ќе треба да се презентираат од страна на претставниците/доставувачите на проектите на Форумот за развој на филантропија во Западен Балкан кој ќе се одржи од 17-20 Јули 2012 во Колашин, Црна Гора. Сите трошоци за учество на по еден претставник од избраните правни субјекти или физички лица на форумот ќе бидат покриени од страна на организаторот Rockefeller Brothers Fund (RBF).
На Форумот ќе се изберат 3 најдобри проекти од регионот на Западен Балкан кои ќе добијат 10.000 УСД за поддршка на имплементацијата на зелената идеја.
Критериуми за учество:
· Идејата да е во фаза на осмислување или штотуку започната со реализација.
· Идејата е комплетно базирана на користење на локални ресурси.
· Има детален план или идеја за да влијае позитивно врз животната средина
· Користи знаење од луѓето во локалната заедница и нивни традиционални вештини
· Има план или идеја за постепен развој
· Го има проценето локалниот пазар – ги познава конкуретните и компаративните предности
· Идејата го подржува процесот на ревитализација на традиционалните локални бизниси и поврзувањето на луѓето со заедницатa.
· Идејата е уникатна и нема парична поддршка од владините институции на локално и централно ниво или од меѓународни донаторски агенци
Терминот „зелени идеи“ означува идеи кои придонесуваат кон животната средина, кои користат ресурси од локалната заедница и кои придонесуваат кон одржливиот развој (интеграција на локалните, економските, социјалните и еколошките потреби и приоритети на заедниците)
11 Ное
11 Зелени моменти …
Ви одзема само момент … да донесете вистинска одлука … да ги замените лошите навики, со кои предизвикувате негативни последиците врз животната средина, со нови зелени навики …
Денеска е 11.11.2011 година, а ние ви предлагаме 11 зелени моменти:
- Купете украсно стаклено/керамичко шише за течен сапун. За да ја намалите количината на отпад од пластични шишиња која ја создавате во вашиот дом, купувајте течен сапун во големи (економични) пакувања и дополнувајте го вашето убаво шише.
- Употребувајте филтер за вода. Престанете да купувате пакувана вода и употребувајте филтер за вода. Со тоа ќе заштедите и ќе ја намалите количината на пластичен отпад кој завршува на депониите.
- Јадете повеќе зеленчук и овошје. Со оваа одлука ќе влијаете врз ефектите од глобалното затоплување, бидејќи производството на месни и млечни производи создава голема количина на емисии на јаглерод.
- Користете платнени торби. Купете си убава платнена торба од природни материјали (лен, јута, памук) и секогаш имајте ја при рака кога одите да пазарувате. Така ќе заштедите и ќе ја намалите количината на отпад која ја секојдневно ја создавате.
- Откажете ја претплатата на „хартии“ кои не ви се потребни. Доколку ви се промениле интересите или можете „хартијата“ да ја најдете на интернет, едноставно откажете ја претплатата. Така ќе ја намалите количината на хартија која секојдневно завршува на депонија.
- Внимавајте на топлината. Наместете го загревањето на топлата вода до максимум 120°С. Кога се подготвувате да печете нешто, не ја загревајте рерната подолго од 10 минути. За илустрација, ако секое семејство го намали времето на загревање за еден час годишно, ќе се заштеди енергија доволна за печење на 1.000.000 колачиња.
- Внимавајте на потрошувачката на вода. Со едноставна замена на постоечките чешми со нови модели со помал проток, ќе ја намалите количината на употребена вода за 30%. Исто така можете да сметате и на количината вода собрана од вашиот клима уред и да ја употребите за чистење на домот или за наводнување на цвеќињата.
- Пешачете. За кратки релации, наместо да седнете во автомобил, изберете пешачење – прошетката е бесплатна, штеди гориво, не придонесува за проширување на озонските дупки и ви помага да останете во добра кондиција.
- Помогнете и на природата. Засадете локални билки во вашата градина или на балконот, вклучете се во акциите за засадување на дрва, не ги кинете цвекињата, не оштетувајте ги гранките на дрвата, не ја газете тревата – поголемиот број на “зелени” растенија значи и поголем филтер за планетата земја.
- Не бидете алчни. Искористете ги целосно, ако е возможно и неколкукратно, предметите пред да ги фрлите. Пред да купите нешто бидете сигурни дека истото ви е неопходно. Во спротивно само додавате количина на постоечкиот отпад.
- Празници без отпад. За време на празниците најголема количина отпад создаваат пакувањата (украсните хартии, украсните кеси, панделки) од подароците. Реупотребете стари хартии и пакувања, или купете рециклирани материјали. Бидете креативни и уникатни.
Кои зелени моменти можете вие да ни ги предложите?
8 Ное
Go Clean
Денес во просториите на ЕУ Инфо Центарот во Скопје се одржа најавениот семинар на тема „Управување со отпадните батерии во земјите на Европската Унија и релевантната легислатива во Република Македонија“. Тој е прв настан од проектот Go Clean, кој има за цел да ја подигне свеста за управување со отпадни батерии, рециклирање и креирање на соодветна структура за спроведување на Законот за управување со батерии и акумулатори и отпадни батерии и акумулатори.
Проектот е поттикнат од Амбасадата на Шведска во Република Македонија и Министерството за животна средина и просторно планирање на Република Македонија, во партнерство со организациите Go Green, 4х4х4 Балкански Мостови и ГРИНЕР, а поддржан од Амбасадите на Норвешка и Република Словачка во Република Македонија и маркетите КАМ Маркет, РАМСТОР, ТИНЕКС и ВЕРО. Проектот
Семинарот го отвори Министерот за животна средина и просторно планирање на Република Македонија, г. Абдулаќим Адеми. Во своето обраќање тој ја назначи важноста на овој проект, како неговиот значаен придонес кон имплементирањето на Законот за управување со батерии и акумулатори и отпадни батерии и акумулатори. Истовремено беше акцентирана поддршката на воспоставувањето систем за собирање на отпадните батерии, кој ќе овозможи искористување на корисните компоненти од овој тип на отпад, но и зачувување на животната средина.
Амбасадорот на Шведска, г. Ларс Вахлунд, во детали ги презентираше фазите и предвидените активности во проекот. Неговото излагање го истакна значењето на подигнувањето на свеста на граѓаните за заштитата на животната средина, но и неопходноста од создавање на заедничка платформа во која сите засегнати страни ќе можат заедно да се информираат, да создадат релации за соработка и заедно да делуваат во заштитата на животната средина. Г. Вахлунд го презентираше и малиот контејнер за отпадни батерии кои ќе се користи во кампањата за собирање на отпадните батерии, а ќе биде поставен во маркетите кои се дел од овој проект, на територијата на Скопје, Куманово и Тетово, почнувајќи од 01.12.2011 година.
Свои излагања имаа и Д-р Снежана Стојковска (која го образложи штетното влијание на составот на батериите врз здравјето на луѓето и врз животната средина), г. Ларс Еклунд, експерт од Шведската агенција за заштита на животната средина, (кој ги пренесе искуствата од применетите практиките во неговата земја) и Раководителот на секторот за управување со отпад г-а. Ана Каранфилова Мазнева (која се задржа Законот за управување со батерии и акумулатори и отпадни батерии и акумулатори и обврските кои произлегуваат од него, со особен осврт на деловите кои се однесуваат на Производителите на батерии). Семинарот беше заклучен со дебата на темата и одговори на прашањата на присутните.
Следен настан од овој проект е Семинарот за млади, кој е планиран за 12.11.2011 година на Економскиот факултет во Скопје.
ГРИНЕР 